KIKO TA E KAMINDA NEOKATEKUMENAL?
UN SINTESIS TEOLÓGIKO-KATEKETIKO MEI MEI DI ESNAN MAS POBER
E kaminda Neokatekumenal ta nase e aña 1964 den e barakanan di Palomeras Altas, na Madrid (Spaña). E ambiente di e barakanan tabata formá pa esnan mas despresiá di e sosiedat: gitanonan i hende marginá, mayoria di nan no tabata sa lesa ni skibi, nan tabata hende sin kas, ladronisia, prostitutanan, delinkuentenan hubenil, etc. Den e ambiente ei a spreit e simia di e Kaminda Neokatekumenal. Mei mei di e pobernan i despresiá ku, ora nan a risibí e anunsio di Kristu morto i resusitá a mira kon Spiritu Santu tabata lanta un proseso di inisiashon kristian paresido na e katekumenado di Iglesia primitivo.
Na kuminsamentu di e añanan 60, Francisco José Gómez Arguiello (Kiko), un pintor spañó ku a gana e premio nashonal di Pintura na 1959, despues di un krisis eksistensial, a deskubrí den e sufrimentu di e inosentenan e misterio di Kristu Krusifiká, ku tabata presente den esnan ku mundu ta konsiderá komo últimonan. E eksperensia akí a hasi’e bandoná tur kos i, sigui e pasonan di Charles di Foucauld. Asina el a bai biba mei mei di e pobernan di Palomeras Altas.
Den e proseso akí (Kiko) ta risibí e inspirashon di Mama Maria: “mester hasi komunidatnan kristian manera e Santa Famia di Nazaret, ku ta biba den humildat, sensies i alabansa. E otro ta Kristu”
Carmen Hernandez, tambe spaño, lisensiado den kímika, a haña formashon den e instituto di e Mishoneranan di Kristu Hesus. El a hasi e lisensia den Teología ku e padernan Dominiko di Valensia i asina e ta deskubrí e renobashon di e Konsilio Vatikano II dor di e liturgista Mons. Pedro Farnés Scherer.
Despues di dos aña na Israel, den kontakto ku e tradishon bibu di e pueblo Hudiu i ku e lugánan di Tera Santu, el ta bolbe bai Madrid ku speransa di forma un grupo mishonero pa evangelisá e hendenan ku tabata traha den e minanan di Oruro (Bolibia), pa e petishon di Mons Jorge Manrique Hurtado, arsobispu di la Paz. Dor di su ruman muhé e ta tuma kontakto ku Kiko Arguello den e barakanan di Palomeras, e ta bai ei, i ta traha un baraka pa e mes riba e flur ku a keda di un fabrika, i asina e ta kuminsá kolaborá kuné.
E PROMÉ KOMUNIDAT DEN E BARAKANAN DI PALOMERAS DI MADRID
E personalidat artístiko di Kiko, su eksperensia eksistensial, su formashon komo katekista den e kursonan di kristiandat i e impulso di evangelisashon di Carmen, su preparashon teológiko i su konosementu di e Misterio di Pasku di Resurekshon i di e renovashon di e Konsilio Vatikano II, uní ku e ambiente di e hendenan mas pober riba tera, ta e laboratorio ku a duna lugá na e síntesis kerigmátiko, teológiko-katekétiko, ku ta e kolumna prinsipal di e proseso di evangelisashon di adulto akí ku ta e Kaminda Neokatekumenal.
Asina a nase e promé komunidat fundá riba e trípode: Palabra di Dios-Liturgia-Komunidat, ku ta kondusí na un komunion fraternal i un fe madurá.
E eksperensia kateketiko nobo akí, ku a sprei di e liña di e renovashon ku e Konsilio Vatikano II a produsí, a ser risibí di un manera positivo pa Mons. Casimiro Morcillo, arsobispu di Madrid. El a stimulá e Inisiadónan di e kaminda pa ekstendé esaki den a parokianan ku lo a pidi’e. E eksperensia akí a ekstendé poko poko den e arkidiosesis di Madrid, na Zamora i den otro diosesis spañó.
KON E KAMINDA A YEGA NA ROMA
Despues ku a forma e promé komunidat mei mei di e pobernan, i ku Kiko i Carmen a ser invitá pa algun Pastor di parokia di Madrid pa hiba na nan parokia e eksperensia akí, i tambe na Zamora, den diferente ambiente, nan a bai Roma kompañá pa Mons Dino Torreggiani, fundadó di e Instituto di e Sirbidónan di Iglesia (un kongregashon di saserdote dediká na e pastoral di esnan marginá, gipsy i migrantenan), awe Mons Torreggiani ta den proseso di Beatifikashon.
Torreggiani a konosé Kiko i Carmen na Ávila (España), i a asistí na un grupo di katekesis ku nan a duna na Santiago den e añanan 66-67. El a mira den e eksperensia aki di Kiko i Carmen un kontesta na e nesesidat di evangelisashon di esnan ku a alehá, i asina el a invitá nan na Roma, kaminda nan a bai kompañá pa un saserdote di Sevilla.
Promé ku nan a kumisá ku e biahe, nan a topa ku esun ku den e tempu ei tabata arsobispu di Madrid, Mons. Casimiro Mocillo, ku tabata esun ku a duna apoyo na Kiko i Carmen den e tempu ku nan tabata na e barakanan, i a motivá nan pa sigui plama e kaminda den e kapital di España. Morcillo a entregá nan un karta di rekomendashon pa e vikario di Papa na Roma, kardenal Anngelo Dell’Acquia, i un otro karta pa e kardenal di Florensia, Ermenegildo Florit.
Kiko i Carmen a yega Roma na yuli di aña 1968. Poko tempu despues ku nan a yega, Torreggiani a hiba nan na e Birgen di Pompeya (Nápoles) pa nan enkomendá nan mishon na e advokashon mariano aki ku ta hopi popular den e pais ei.
Don Dino Torreggiani a kompañá nan bishitá algun pastor di parokia, i nan tabata splika nan e Kaminda i kon el a kuminsá mei mei di esnan mas pober di Madrid. Tòg, e renovashon di Konsilio Vatikano II no tabata wòrdu komprondé kompletamente i nan no a akohé Kiko i Carmen. E ora ei Kiko a sinti e yamada di Dios pa bai biba atrobe mei mei di e pobernan den e Borghetto Latino di Roma, pa spera un manifestashon di Señor i asina konosé kiko tabata Dios su boluntat.
Asina Kiko a keda instalá den e zona marginá aki di Roma, vários hóben a keda impreshoná di su eksperensia i nan a invit’é na un kongreso di komunidat di base den e kokalidat di Nemi (pafó di Roma).
Ei, den un sala yen di hóben -mayoria di nan ku ideología komunista- nan a pidi pa Kiko duna su testimonio. Despues, algun di nan a invitá Kiko na un misa animá ku guitaranan den un sala di e parokia di “Martires Canadienses” . Ei, nan a puntré su opinion, i Kiko a kontestá nan: “E renovashon di Iglesia no ta bini dor di e guitaranan, pero ku e anunsio di e Kerigma i e Misterio di Pasku di resurekshon”.
Poko tempu despues, Kiko a hiba e grupo di hóben akí na un retiro. Despues di esei nan a propon’é di kuminsá duna e katekésisnan di e Kaminda den nan parokia.
Di e manera akí, e di a 2 di novèmber di 1968 a nase e promé komunidat Neokatekumenal di “Martires Canadienses” ku 70 persona.
E kaminda a kuminsá plama den otro parokianan i Pader Mario Pezzi a uni na e ekipo formá pa Kiko i Carmen.
E KAMINDA, FRUTA DI E KONSILIO VATIKANO II
Den e aña 1974, e Papa Pablo VI, den un audiensia ku el a konsedé na e promé komunidatnan neokatekumenal, a rekonosé e kaminda komo un fruta di e Konsilio Vatikano II: “Ata akí e frutanan di e konsilio! Boso ta hasi despues di e boutismo loke Iglesia primitivo tabata hasi promé: si ta promé òf despues, ta algu sekundario. E echo ta ku boso ta mira na e outentisidat, e plenitut, e koherensia, e sinseridat di e bida kristian. I esaki tin un mérito hopi grandi, i ta konsolá nos tremendamente… O kuantu alegria boso ta duna nos ku boso presensia i aktividat”.
E pontífisenan (papanan) susesivo a duna impulso i a rekonosé e Kaminda komo un fruta i inspirashon di Spiritu Santu pa yuda Iglesia. Tambe e papa Huan Pablo I, ku ora tabata patriarka di Venesia a akohé Kiko i Carmen pa kuminsá e kaminda den su diósesis.
San Huan Pablo II a impulsá, fortalesé i fasilitá e desaroyo di e inisiashon kristian pa adulto akí, i a favoresé modalidatnan mishonero i vokashonal nobo manera e famianan den mishon i e formashon di e seminarionan diosesano mishonero Redemptoris Mater.
Den e aña 1990 San Huan Pablo II a skirbi den e karta Ogniqualvolta: “Mi ta rekonosé e Kaminda Neokatekumenal komo un itinerario (proseso) di formashon katóliko bálido pa e sosiedat i e tempu di awe”, i “p’esei, mi ta deseá ku forsa, pa mi rumannan den episkopado duna balor i yuda -huntu ku e presbíteronan (saserdotenan)- e obra akí pa e evangelisashon nobo”.
PROME FRUTANAN MISHONERO KU SAN HUAN PABLO II
Ora e kaminda Neokatekumenal a kuminsá plama komo un proseso di formashon katóliko i di madurashon di fe, a sprei e promé frutanan i karisma-nan di evangelisashon di e realidat akí di Iglesia. Na 1986, San Huan Pablo II a akohé ku legria i a favoresé na Roma e prome seminario Redemptoris Mater.
For di e Hubileo di e hobennan di e aña 1984 i e promé WYD (Dia mundial di Hubentut) konvoká pa San Huan Pablo II den e aña 1986, míles di hóben di e Kaminda Neokatekumenal a kompañá e Santo Pader (Papa) den e hornadanan akí. For di esei, den kada WYD e responsabelnan di e Kaminda ta hasi un enkuentro vokashonal despues di e hornadanan, kaminda hopi hóben (hòmber i muhé) ta mustra nan disponibilidat pa sigui e saserdosio i e bida konsagrá.
Na 1988, de e lokalidat italiano di Porto San Giorgio, San Huan Pablo II a manda e promé 100 famia pa evangelisá diferente parti di mundu.
Tambe é ta esun ku a promové e estatutonan di e Kaminda Neokatekumenal for di 1997.
APROBASHON DI E ESTATUTONAN KU BENEDICTO XVI
Benedicto XVI, tambe a kompañá, sostené i animá e ekspanshon mishonero di e Kaminda. Durante su pontifikado, den e aña 2008, a ser aprobá e Estatutonan di Kaminda Neokatekumenal di manera definitivo pa e Pontifisio Konseho pa e Laikonan. Tambe e Kongregashon pa Doktrina di fe a duna su aprobashon doktrinal na e Direktorio Katekétiko den e aña 2010.
PAPA FRANSISKO TA DUNA UN IMPULSO NOBO
Den e promé oudiensia ku e inisiadónan i rumannan di Kaminda, Papa Fransisko a bisa: “Mi ta yama Dios danki pa e alegria di boso fe i pa e zelo di boso testimonio Kristian, Danki Dios! (…) Mi ta yama boso danki pa tur loke boso ta hasi pa Iglesia i den mundu”.
E Papa aktual, a manda den aktonan sòlèm i den diferente okashon famianan mishonero, saserdotenan i mishonnan ad gentes na luganan di mundu kaminda Kristianismo ta disparsé.
Dia 6 di mart di 2015, den un oudiensia nobo ku Kaminda Neokatekumenal, e tabata bisa na e inisiadónan i na e miembronan di kaminda ku tabata presente ei: “Mi ta kumindá e inisiadónan di Kaminda Keokatekumenal, Kiko Argüello i Carmen Hernández, huntu ku P. Mario Pezzi; tambe na nan mi ta ekspresá mi apresio i mi ta enkurashá nan pa tur lo ke dor di e kaminda nan ta hasi pa benefisio di Iglesia. Ami semper a bisa ku Kaminda Neokatekumenal ta hasi un bon tremendo na Iglesia!”.
AKTUALIDAT DI KAMINDA KATEKUMENAL
19 di yuli di 2016 Carmen Hernández a fayesé, e tabata inisiadó huntu ku Kiko Argüello, i a ser derá den e seminario Redemptoris Mater di Madrid. Ora e tim responsabel a keda inkompleto, i bou di solisitut di Santa Sede – di akuerdo ku loke ta pará den statutonan di Kaminda-, un aña i mei despues María Ascensión Romero a ser inkorporá komo miembro di e tim. E tabata itinerante durante 25 aña na Rusia.
Kaminda Neokatekumental ta na sirbishi di e obispunan i parokonan (pastor di parokia) komo un itinerario pa bolbe deskubrí e boutismo i pa un formashon permanente den fe. E ta wòrdu proponé na e fielnan ku ta deseá rebibá den nan bida e rikesa di e inisiashon kristian.
E Kaminda – ku ta wòrdu biba den parokianan, den komunidatnan chikitu formá pa hende di edat i kondishon sosial diferente- ta guia e fielnan di un manera progresivo na e intimidat ku Hesukristu i ta transformá nan den suhetonan aktivo i testigunan kreibel di e bon notisia. Ta un instrumento di inisiashon kristian pa adulto ku ta preparando pa risibí boutismo.
Datonan di e Kaminda Neokatekumenal
Aktualisá na yuli 2025
Komunidatnan: 20.300
Diosesisnan: 1392
Parokianan: 6197
Nashonnan: 139
Seminarionan Misionero Diosesano:
Seminarionan Redemptoris Mater: 116
Seminaristanan: 1903 i 61 diakononan
Saserdotenan forma den e SRM: 3263
Famianan Mishonero:
Famianan den mishon: 936 evangelizando na 209 Missio ad Gentes den 68 nashon.
Esnnan ku ta reforsá i sostener e kaminda di fe: 738 den diferente nashon
Famianan den ekiponan itinerante: 300
EKIPO INTERNASHONAL
e ekipo responsabel internashonal di e Kaminda Neokatekumenal ta formá for di 2018 pa Kiko Argüello – responsabel di Kaminda-, Maria Ascensión Romero, i e presbitero (saserdote) P. Mario Pezzi. For di kuminsamentu na 1964 i te ku 2016, tabata formá pa Kiko Argüello i Carmen Hernández, nan dos a inisi’e, i P. Mario Pezzi. Después ku Carmen a fayesé 19 di yuli 1016, i segun e statutonan, Maria scensión a wòrdu inkorporá na e ekipo. E ekipo akí tin e funshon di hiba dilanti e Kaminda Neokatekumental ront mundu, ku e kolaborashon di ekiponan di itinerante di kada nashon. Entre nan responsabilidatnan, tin esun di guia e kumplimentu di e Kaminda Neokatekumenal i garantisá e outentisidat di esei. Tambe nan tin ku ehersé ekompetensianan propio di akuerdo ku Statuto Ofisial; realisá e konsultanan oportuno; mantené relashon regular ku obispunan diosesano; i tambe mantene un relashon regular ku e Dikasterio pa laikonan, famianan i bida di Santa Sede, ademas di otro responsabilidat.
BIOGRAFIA
