“Në vitin 2006, Benedikti XVI nisi këtë formë të re të ungjillëzimit duke dërguar Missio ad gentes të para. Secili prej tyre përbëhet nga një prift, i shoqëruar nga 4-5 familje me fëmijët e tyre. Me kërkesë të Ipeshkvit, familja merr dërgimin për të ungjillëzuar në disa zona të çkishtëruara ose pagane, me misionin për të krijuar një komunitet të krishterë që të jetë “plotësisht një, që të besojë bota” (cf Gjn 17,23).”
“Shën Gjon Pali II, gjatë Simpoziumit të VI të Ipeshkëve Evropianë në vitin 1985, theksoi se për të përballuar sekularizimin e Europës, ishte e nevojshme të ktheheshim tek ‘modeli i parë apostolik’.”
“Kështu, këto Missio ad gentes, duke ndjekur shembullin e domus ecclesiae, mblidhen në shtëpi, midis atyre që nuk janë pagëzuar dhe atyre që janë larguar.”
Pas shumë viteve nga dërgimi i parë, mund të shihet se si shumë njerëz të largët dhe paganë, të cilët ndoshta nuk do të kishin hyrë kurrë në një kishë, gjejnë veten në këto “bashkësitë kristiane” dhe nisin një ecje kthimi në besim.
Këto bashkësi, që nuk nisin nga një ‘vend i shenjtë’, nga një ‘tempull’, por jetojnë në mes të botës, përbëjnë një “oborr të paganeve ku njerëzit mund të afrohen Zotin pa e njohur atë”, siç ka thënë Benedikti XVI në fjalimin e tij para Kurisë Romake në vitin 2009.
Një element i jashtëzakonshëm i kësaj përvoje janë frytet e bashkimit dhe njësimit që japin, në vendin e parë, brenda vetë familjes, midis prindërve dhe fëmijëve.
Më 18 mars 2016, Papa Françesku dërgoi 270 familje, duke formuar 54 Missio ad gentes të reja në pesë kontinentet. Gjatë këtij takimi, Papa Françesku shpjegoi se në çfarë konsiston kjo mënyrë misioni: ‘Missio ad gentes krijohen me kërkesë të ipeshkëve të dioqezave ku janë të destinuara dhe përbëhen nga 4 ose 5 familje – shumica me më shumë se 4 fëmijë –, një prift, një djalë dhe dy vajza. Të gjithë së bashku formojnë një bashkësi që ka misionin të japë shenjat e besimit që tërheqin njerëzit në bukurinë e Ungjillit’, tha ai.
Papa Benedikti XVI, nga viti 2006 deri në vitin 2012, dërgoi 58 Missio ad gentes dhe Papa Françesku ka dërguar 128.
Më 5 maj 2018, me rastin e takimit ndërkombëtar për 50-vjetorin e lindjes së bashkësisë së parë të Ecjes në Romë, që u zhvillua në Tor Vergata (Romë), Papa Françesku dërgoi 34 Missio ad gentes të reja.
Numri i familjeve të Ecjes që janë sot në mision (2020) për ungjillizimin e ri është 1.640, me rreth 5.800 fëmijë, në 108 shtete të pesë kontinenteve. Shumë nga këto familje janë në mision në më shumë se 200 Missio ad gentes në 62 shtete.