Një tjetër fryt i Ecjes janë ‘Bashkësitë në mision’. Gjatë takimit me Papën Benediktin XVI në Bazilikën e Shën Pjetrit më 10 janar 2009, me rastin e 40-vjetorit të lindjes së bashkësisë së parë neokatekumenale në Romë, Ati i Shenjtë dërgoi 15 bashkësi neokatekumenale në periferinë e Romës.
Këto janë bashkësi që kanë përfunduar Ecjen Neokatekumenale të ripërteritjes së fesë së tyre dhe janë të gatshme të lënë territorin e famullisë së tyre, për të shkuar në famulli të tjera periferike, me ftesë të ipeshkëve përkatës, për të animuar dhe mbështetur një shërbim ungjillizimi: janë zona shpesh të degraduara, me shumë dhunë, drogë dhe shumë imigrantë.
Kiko, duke prezantuar këtë mision të ri vëllezërve, theksoi se “Ecja mbaron me shpalljen e Ungjillit në të gjithë botën”. “Një nga risitë më të mëdha është që bashkësia në tërësin e vet shkon në mision. Jo vetëm disa vëllezër: shkon bashkësia e tërë. Është një hir i madh! Është diçka e mrekullueshme që Zoti t’ju dërgojë në këtë mision. Është fantastike të mund të niseni, që Zoti t’ju japë një mision: të vdesësh në mision, të plakesh në mision”.
Pikërisht Papa Francesku në enciklikën e tij Evangelii Gaudium flet për një Kishë ‘në dalje’ dhe flet për nevojën për të ungjillizuar periferi territoriale dhe ekzistenciale.
Në dioqezën e Madridit, ku ka filluar Ecja, dhe është e pranishme në 45 famulli, me shumë bashkësi, ekziston kjo përvojë. Në vitin 2011, arkipëshkvi i atëhershëm i Madridit, Kardinali Rouco Varela, dërgoi në mision 10 bashkësitë e para.
Arkipëshkvi i tanishëm i Madridit, Kardinali Carlos Osoro Sierra, më 22 mars 2015 dërgoi 8 bashkësi të reja. Në Madrid, ka në total 18 “Communitates in missionem”.
Po ashtu, edhe Papa Francesku, më 5 maj 2018, me rastin e 50-vjetorit të Ecjes në Romë, në një takim të madh në Tor Vergata, dërgoi 25 bashkësi në mision në famulli të ndryshme të Romës, për të mbështetur jetën e krishterë të bashkësive famullitare që ishin më në vështirësi.
Sot, në këtë ‘Shkoni’ të Jezuit, janë të pranishme skenarët dhe sfidat gjithmonë të reja të misionit të ungjillëzimit të Kishës. Të gjithë jemi të thirrur në këtë ‘nisje’ të re misionare. Çdo krishterë dhe çdo bashkësi do të diskutojë se cila është rruga që Zoti tregon, por të gjithë jemi të ftuar ta pranojmë këtë thirrje: të dalim nga zonat tona të mirëqenies dhe të guxojmë të arrijmë në të gjitha periferit që kanë nevojë për dritën e Ungjillit.